----- Original Message -----
From: Petrus Potgieter
To: Die Poort
Sent: Wednesday, October 08, 2008 1:15 PM
Subject: Re: BESOEK AAN DIE POORT

DAG TALITHA Ons het vir die volgende trajek van ons (pelgrims)reis, wat met wuiwende walvissterte in Witsand begin en na Calitzdorp lei, eintlik ook nie die haas onbeperkte reserwes van die Land Rover nodig nie, ook nie verby Seweweekspoort en deur die Huisrivierpas nie, maar toe ons net hierna links, op die Matjiesvlei grondpad afdraai en na enkele haarnaalddraaie verras word met onvergelyklike vergesigte, maar eweneens gapende afgronde, het ek tóg die gerusstelling van die 4-trek reserwes en 'n betroubare, klassiek Britse V8 hóóg op prys gestel.Natuurlik is daar baie van die aandelemarkelemente wat kan bewys dat hulle stroomlyn stadswiele gemaklik kan doen wat my ossewa kán, maar ek is nog van die óú soort wat 'n beleid verkies waar daar áltyd iets in reserwe is: as dit dan nie net die greep van 4-trek bande is nie, dan inderdaad die greep van vier wiele en as dít nie genoeg is nie, dan laagstrek en ook nog ewenaarslot en, uiteindelik, die wen-as. As die boek ENVIRONMENTAL MANAGEMENT IN SOUTH AFRICA, waarvan Andre Rabie mederedakteur is en wat volgens ons (latere) waarneming in die UPE-boekwinkel 'n voorgeskrewe handboek is, net halfpad so helder en duidelik is as sy onderstaande roetebeskrywing aan ons, dan verstaan ons waarom dit voorgeskryf is:

Indien julle van Kaapstad se kant af ry, neem die R62 roete wat via Montagu, Barrydale en Ladismith strek. Van Ladismith ry na Calitzdorp oor die Huisrivierpas. Nadat julle oor die Gamkarivierbrug gery het, sal die pad weer teen 'n laaste opdraende gaan voordat dit afsak na Calitzdorp. Bo-op die bult van daardie opdraende draai 'n grondpad uit na links (Noord) met naambord Matjiesvlei (dis ongeveer 5 km voor Calitzdorp). Draai af na Matjiesvlei en volg die nouerige grondpad vir ongeveer 7 km (moenie afdraai by 'n pad wat na links afdraai met naambord "BJ Nel Die Kom" nie). Julle sal dan by 'n T-aansluiting uitkom en vir die eerste keer enkele huisies en landerye sien. Draai by die T aansluiting na links (Wes). Nog huisies sal weldra sigbaar wees en na ongeveer 400 meters sal julle by die Gamkarivieroewer uitkom. Hou steeds aan met die pad wat na ongeveer 200 meters weer die rivieroewer verlaat, maar na 2-3 km 'n laagwaterdrif bereik. Gaan oor die drif en neem die pad wat regs (Noord) afdraai (geen naambordnie) en dan parallelmet die rivier loop vir omtrent 100 meters waarna dit teen 'n opdraende uitgaan aan die voet waarvan daar 'n bord is met die teken "Privaatpad/Private Road." Hou aan met die pad en julle sal by 'n (gewoonlikoop) hek kom. Gaan aan met die pad wat dan weer teen 'n opdraende uitgaan. 'n Huisie sal sigbaar wees, maar hou aan met die pad, ook verby die volgende huisie totdat julle by ons huis uitkom (ongeveer 1 km van die hek af). Dis 'n ietwat omslagtige beskrywing, maar julle behoort nie te sukkel nie. Die pad is nie te wonderlik nie, maar is vir 'n motor begaanbaar. Indien die motor laag is, moet julle net versigitig ry waar die pad klipperig is.Ons sien baie uit na jul koms en hoop dat die plek na jul smaak sal wees. Daar is geen winkels of ontwikkeling in ons omgewing nie, so julle sal jul voorrade vooraf moet aanskaf - miskien op Ladismith waar daar 'n goeie Spar supermark is. Calitzdorp is ongeveer 17 km van ons af en daar is twee swak supermarkte en 'n goeie slaghuis. Daar is wel 'n goeie restaurant (Rose of the Karoo). Daar is gas-yskaste in die twee huisies wat julle huur sodat bederfbare produkte daarin geplaas kan word.Indien julle van Kaapstad se kant kom, is daar 'n alternatiewe roete (ongeveer dieselfde afstand) tot die R62, nl om die N1 te neem tot by Laingsburg en dan Suid te ry met die goeie grondpad deur Seweweekspoort wat dan weer by die R62 aansluit tussen Ladismith en Calitzdorp. Seweweekspoort is een van die hoogtepunte in ons omgewing, maar julle sal dit ook van ons plaas af kan besoek.Laat my asb weet indien julle enige vrae of besondere behoeftes het en of julle inligting verlang oor besienswaardighede in die omgewing. Wanneer beplan julle om by ons aan te kom? (Vanaf Kaapstad sal die reis ongeveer 5 ureduur.) Julle is welkom om aanpassings te maak,indien nodig. Indien jy telefonies bereikbaar sal wees in SA, verstrek asb die nommer. Wanneer kom julle in SA aan?Groete en goeie wenseAndre RabieTel: (044) 2133992 - telefoon soms ietwat onduidelik en maksimum internetspoed is 21 kb! Ons is soms op Dinsdae in Oudtshoorn waar my vrou kunsklasse bywoon.

Dit illustreer egter ook waarom Andre outeur is van akademiese werke -- uit sy roetebeskrywing kry 'n mens gladnie 'n idee watter eindeloos indrukwekkende en mooie wêreld 'n mens deur Die Poort betree nie -- nie net van natuur nie, maar ook van aard...Hierdie is nié die virtuele wêreld van die sub-prima verbandlenings of die aandelemark subkultuur nie, maar 'n wêreld waar die eksistensiële óérelemente vuur, grond, water en lug in 'n delikate samespel 'n unieke natuurgees skep wat die mens onontkombaar herinner aan wat waarlik fundamenteel, wesenlik, essensieel en oorspronklik in die lewe is. Aan die einde van die Winter gee die wind, wat onkeerbaar deur die poort ráás, die pas aan met 'n aarde wat hom weinig laat aanjaag om uit sy winterslaap te ontwaak...Ons het eers by Andre verneem of ons -- ten spyte van die wind -- 'n vuur op die buitevleisbraaiplek aan die gang kon kry en hy het my verseker dat dit veilig sal wees want hý het al daar vleis gebraai in 'n wind wat die vlamme horisontaal gehou het sonder om 'n veldbrand te veroorsaak, met die gevolg dat ons op die hartbeeshuisie se stoep 'n gawe vuur gestook het met die kalmerende water van 'n eeue-oue leivoor aan ons voete en 'n klipgooi onder in die vallei die rustige water van die Gamkarivier.Dan is daar die makrokosmiese sterrehemel wat gewoonlik teruggetrokke op ons mikroskopiese kennisname wag, maar hier -- onbelemmer deur elektriese krag -- met uitbundige oorgawe die hele hemelkoepel soos 'n netvet/netvlies omspan: waar jou oog ook reik, galop die diereriem! Die MENS word wat hy is: mens -- eintlik niks minder nie, maar beslis niks méér nie; ook 'n klein, maar onmisbare, onderdeel in 'n ewige en eindeloos geheel.'n Mens gaan deur Die Poort om tot jou self te kom: dit is beslis nie "ingerig" vir die deursnee toeris nie, want daarvoor is 'n mens waarskynlik te veel aangewese op jou eie vernuf, vindingrykheid en improvisasievermoë om al die egte en outentieke , basiese bestaanshulpmiddele wat verskaf word, te gebruik en die meeste hedendaagse virtuele mense is mos, op die gebied van gesonde verstand, gestrem.Nadat ons die volgende dag -- via die Kruisrivier/Matjiesrivierpad -- die Kangogrotte besoek het en die onvergelyklike Swartbergpas se uitdaging heen-en-weer aanvaar het, was ons eers ná donker terug tuis met 'n wind wat 'n Baaise stormwind sou kon dwing om uit te haal en te wys. Ons het ons seile skromeloos na die wind gespan en ons vleis in die vuurherd in die voorkamer gebraai.Die Poort laat my dink aan die Groot Raaiselhek in hoofstuk VI -- The Three Magic Gates -- in THE NEVERENDING STORY van Michael Ende. Dit is eintlik 'n skrikwekkend maklike manier vir die Afrikaner om met hom self gekonfronteer te raak en te sien wie en wat hy is en waarvandaan hy kom: sy ware aard, sy kern en essensie en sodoende koers te hou!

Groete pi

Op 29 september 2008 17:44 schreef Die Poort <info@diepoort.net> het volgende:

Hallo Petrus Ek dink die fotos is great! Kan jy dalk net vir my julle ervaring van die besoek in 'n email beskryf dan kan ek dit op ons nuwe website sit.

Baie dankie.

Talitha

Die Poort Nature Reserve
www.diepoort.net
info@diepoort.net

VORDERINGSVERSLAG

Dis nou byna twee maande ná my vorige inskrywing in hierdie joernaal (weliswaar nié van Jorik), maar in ieder geval eietyds genoeg om sy bestaan te regverdig.
In dié twee maande het ek verder swerftogte op (virtuele) paaie gemaak as waaroor PJ Schoeman ooit sou kon droom en ofskoon daar al aanduidings bestaan van die eerste kristallisasie in die primordiale sop, is die beginpunt van mý reis nog hoegenaamd nie vasgelê nie.

Ná tallose ompaaie/kruispaaie (waar ek Jesus byna teen die lyf geloop het)
/hobbelpaaie/kronkelpaaie
/doodloopstrate (waar alles behalwe die Stroewe Oester te bekenne was)
/eenrigtingstrate
/tonnels/T-aansluitings (en baie bekers koffie)
/sypadaansluitings/skerp aansluitings/skuins aansluitings
/waarskuwingstekens vir skape/beeste/pêre
/wilde diere (wat soos mense vermom is)
/voetgangers/fietsryers/padwerkers
/kinders (wat soos mense vermom is)
/sirkels/klippies (los)/ klippe (vallend en/of gegooi)
/nog paaie: glibbe- en/of glipperig
/driwwe en/of drifte
/kom/beland ek ten einde laaste
op/in 'n Kaapse gomboom:

http://capetown.gumtree.co.za/

...dus, nóú kon die soektog in alle erns begin.

ROAD TRIP

Hy weet met die weerkaatsings in die ruit

vlakke van beelde skuif deur alles heen

en niks is in sy tyd en stof gesluit

maar alles stroom deur grens en eeu aaneen.

" ...-- flonker

oor die brokkige hoogland wat wyd

tussen see en see en oop hemele strek,

altyd 'n gidsster in die groot stryd

van binnelande in Sy naam ontdek..."

Enige nugter leser wat gister se skeppingsbydrae van dié blog lees, weet dat dit maar net 'n mitologiese beginpunt verteenwoordig sodat mense sy oorsprong nie in die newels van die geskiedenis hoef te gaan soek nie...

Alles het eintlik begin kort ná Gustaaf sy rybewys in Januarie gekry het. Hy en 'n paar pelle moes toe opsluit op 'n rt (road trip) iewers heen -- éérs was dit Berlyn, maar ná ek geprotesteer het dat dit te vér is, het die bestemming gewysig tot Keulen en sou Frederick ook mee; toe ons egter hoor hy wil siekte veins by sy sakgeldwerk om saam te kan, het beide ek en Ingrid ons opvoedingstaak gestand gedoen en die idee gekelder.

Later was Spanje, Suid-Frankryk en Denemarke op die agenda, maar as gevolg van te veel sneeu, het dit uiteindelik met die trein in Amsterdam geëindig.

Intussen het 'n rt in SA begin kristalliseer, maar soveel mense het ons gewaarsku dat dit gevaarlik is vir buitelandse jongmense om op hul eie in die land rond te trek, dat ek en Ingrid hulle kon oortuig dat ons hulle "in breë trekke" sou begelei.

Ek het dadelik begin om via internet voorbereidings te begin doen, waaronder natuurlik die reël van transport vir my, Ingrid en ses mansstudente, waarvoor minstens 'n kombi nodig sou wees en onder andere op die volgende afgekom:

http://www.crazycombis.co.za/index.htm

Hierdie moontlikheid het onmiddellik byval gevind by die SUK (Studente Uitvoerende Komitee), maar toe ek 'n maand gelede wou bespreek vir September, toe was hulle al vol en moes die soektog voortgaan.

DIE EERSTE BOEK VAN MOSES, GENOEM GÉNESIS

1 In die begin het God die hemel en die aarde geskape.
2 En die aarde was woes en leeg, en duisternis was op die wêreldvloed, en die Gees van God het gesweef op die waters.
3 En God het gesê: Laat daar 'n blog wees! En daar was 'n blog.

...